【婚禮花球攻略】從身型/禮服配襯花球|最新花球推介:身材嬌小千祈唔好揀…

分類 
婚禮籌備

那個女孩不愛花?由追求到拍拖到婚禮,我諗「花」呢個角色都佔女生心入面一大位置。

喺婚禮上,平均計算,新人都會用上大約三個花球,一個用嚟出門,一個用嚟證婚,一個用嚟拋。但事實究竟幾多個先夠呢?呢邊又話鮮花靚?另一邊又話絲花方便唔使煩,而市面上仲有乾花、保鮮花,應該點揀?唔使騰,NO PROBLEM!姊姊們! 一齊進入簡單版花花世界啦!

籌備婚禮,一開始應該要計劃究竟你想要幾多個花球!如果你有預算,當然可以每個環節都有一個專用花球,但普遍新人都會「一花幾用」,所以花嘅數量絕對取決你用鮮花定絲花!而我自己當日就用左兩個花球,一個鮮花,一個絲花。

 

鮮花 vs 絲花

好多準新娘都會喜歡用鮮花,貪佢夠新鮮,望上去視覺比較靚。但記得留意番鮮花相對要保養、照料嘅時間亦都特別多!如果喜歡鮮花嘅你地,記得請花藝師預早比定鮮花營養液,適時提供鮮花所需嘅水份同養分,婚前一晚亦可以將花放入雪櫃保鮮。而喺 Big day 當日,最好搵一位姊妹全程照顧鮮花,唔需要拎住嘅時候就將佢浸番落水度。千祈唔好放近生果附近!因為生果係鮮花嘅「催熟劑」,想 Keep 得更耐就要好好照顧喇!遠離生果!

 

如果當日新人們rundown 比較趕,冇時間照顧花球嘅話,咁絲花絕對係你嘅好選擇!其實而家好多絲花像真度都非常高,而且花材嘅選擇更加可以超出鮮花嘅「季節限定」,價錢更加親民,新娘子就可以將自己心儀嘅花種請花藝師好好咁呈現出嚟。

 

乾花 vs 保鮮花

近年大興韓風,自然風,所以乾花市場亦應運而生,不少新人喺 Pre wedding 都會用乾花做配襯。若果打算喺 Big day 用乾花做花球,一定要留意乾花嘅特性。因為乾花係將花完全風乾,所以顏色上會啡啡黃黃,亦比較脆弱,大力少少一撳都會”易裂”,所以保存上比鮮花要更為細心。另外亦要留意長輩,特別係四大長老接唔接受到乾花嘅顏色。

幾年前已經聽到保鮮花 / 永生花,或者永不凋謝的鲜花嘅名,見佢地永遠都比個玻璃罩罩住好似不可觸及咁,因為佢地其實真係真花嚟㗎!經過脱水、脱色,跟住烘干、染色等等嘅工序加工而成的花,佢望落喺色澤、形狀、手感上幾乎同鮮花一樣,保存期至少2至3年,所以就叫永生花。不過,由於工序複雜,造價亦比較貴,暫時都未太多新人會選擇嚟做花球,但亦有唔少人會用男朋友求婚送嘅花,拎一支去做永生花嚟紀念呢!

 

揀好花嘅形態後,下一步就係選擇形狀。大家普遍認知,花球以圓形居多,但其實花球嘅形狀都有好多!要知乜嘢花球先係自己The one?新娘的身高、身型絕對係關鍵!

 

1. 圓形花球

經典簡單,結實嘅花束易於保持花球形狀不變,而喺拍攝果陣亦唔使特別遷就花球嘅角度,較適合身型嬌小嘅新娘子。

 

2. 水滴形

外形相對比較歐美。花球嘅拖尾會優美咁慢慢跟住新娘子嘅步伐而喺空中飄揚,古典又高貴!不過拖尾花球形狀較大,適合身型較豐滿的新娘子,令別人看上去感覺較瘦削。但要留意返,拖美嘅花球體積同長度都比其他花球為大,所以身型瘦D同細細粒嘅新娘子就盡量避免選擇呢個款式,或者要同花藝師傾傾,乜嘢嘅長度最適合自己!

 

3. 彎長形花球

所謂彎長形,就係新娘子曲起隻手,輕輕抱住花球嘅姿勢。呢款喺香港相對少見,佢嘅特點就係花球以纖長嘅花莖配合枝葉設計而成,尾部直接露出花莖,跟住用絲帶綁成蝴蝶結。簡單嘅線條美帶出一種時尚感,較適合身型高挑嘅新娘子。

 

4. 小型花球

佢嘅特色就係花嘅數量比其他花球款式相對少,綠葉配素多。花球頂部形狀比較隨性凸起,再以絲帶綁成花束。花莖剪成一致、整齊的長度。呢類花球近年唔少韓式婚禮或者田園婚禮都見唔少!唔少新娘子想個花球傳統得嚟又想特別少少,呢個絕對可入選考慮之列!

 

5. 田園式花束

近年大熱戶外證婚,我自己都唔例外,選擇左喺綠油油嘅草地舉行證婚儀式,所以就將姊妹嘅手捧花變成跟環境融合嘅田園式花束。選材用比較多用綠葉,無特定形態同大小。因為故名思義「田園式花球」就想隨心一D,給人休閒、簡約、隨意嘅感覺。姊姊們都非常喜歡!鐘意田園式嘅新人可以好好考慮呢!

撰文:駐場Blogger - 人妻搜記

圖片來源:駐場Blogger - 人妻搜記、網上圖片